Lengadòc: Jòrdi Frêche dobrís tornar lo robinet

Jòrdi Frêche dobrís tornar lo robinet per la
formacion de formators occitans amb lo CFPO de Besièrs

FORMACION CFPO
*Integratz una formacion qualificanta *
*E venetz formator professional en lenga e cultura occitanas modèrnas!*
*Lo CFPO prepausa una formacion concreta per un mestièr vertadièr.*
Sètz en quista d'emplec e marcat a l'ANPE, sètz diplomat de "l'Escapolaire" o mestrejatz pro l'occitan tant a l'oral coma a l'escrich, e avètz una motivacion granda per l'aprigondir. Avètz lo sens de la comunicacion e de las relacions umanas, un interès bèl per la lenga e la cultura occitanas e l'enveja d'o transmetre als autres. Sètz disponible. Avètz la capacitat de trabalhar en còla mas tanben en autonomia. Coneissètz lo mitan associatiu e cultural...
*Aquesta formacion es per vos!*
Formacion qualificanta per excelléncia e unenca sul mercat, la formacion a per tòca de balhar a cada estagiari los mejans de far passar una lenga occitana usuala, de qualitat, respectuosa de la diversitat dialectala e dobèrta cap a l'interdialectalitat destinada a de publics adultes.
Seretz alternativament en cors en sala e en estagi de practica professionala (sul terren) pendent la durada de la formacion. Aquesta alternança entre teoria e practica constituís la clau de vòlta d'aquela formacion de 10 meses.
Al sortir de la formacion, lo formator serà capable d'avalorar las resultas de son accion e dels aprendissatges per tornar metre en òrdre los contenguts e sègre lo debanament de las operacions. Participarà a la concepcion d'aisinas pedagogicas, e serà capable d'adaptar o experimentar los metòdes pedagogics necites. Serà tanben capable de contribuir a la creacion e a l'animacion d'environament favorable a la socializacion de la lenga. Podrà metre en òbra un plan de coordenacion e de regulacion de las activitats, de las accions d'una còla. Podrà assegurar, en foncion d'una demanda e dels besonhs d'organizacions (entrepresas, associacions, estructuras culturalas divèrsas), una intervencion concernissent lo camp de son especialitat (assisténcia tecnica, participacion a un projècte, estudis...). Podrà animar una còla de trabalh e participar al recrutament dels collaborators e a la causida dels intervenents.
* Aquesta formacion començarà tre lo 02 de febrièr de 2009 per s'acabar lo 27 de novembre de 2009*.
*"La Region LENGADÒC e ROSSELHON finança la mesa en òbra de l'accion de formacion "Formacion de formators en lenga e cultura occitanas modernas" prepausada per l'organisme Centre de Formacion Professionala Occitan""*
*Acamp d'informacion collectiva*
Dimars 13 de genièr de 2009 a 10h00
Pòl de formacion occitan – Salas d'APRENE -
Ostal de la Vida Associativa – 15 carrièra General Margueritte – 34500 Besièrs – 2 nd estanci escalièr C
Per mai d'entresenhas sonatz lo 04 67 28 75 36 o mandatz un corrièr electronic amb vòstras coordenadas a cfpo@cfpoccitan.org.

***

Anaram Au Patac–Lengadòc torna dire als candidats e als camaradas sensibles al respect dels dreits dels trabalhador(a)s amb o sens emplec, e a la luta contra la precaritat, que lo CFPO de Besièrs s’èra engatjat a integrar los estagiaris qu’an seguit la formacion « Cocanha » amb lo diploma d’ « Escapolaire ».
Coma per la formacion Cocanha, Anaram Au Patac–Lengadòc, coma seccion d’una organisacion occitana de lucha de classa, demorarà atentiu al respect dels dreits dels estagiaris per aquela formacion de formators (tritz), coma al respect dels engatjaments dels CFPO envèrs los precaris estagiaris.
Per mai d'informacion veire l'article sus aqueste blog "Dels precaris se baton per viure l'Occitània !".
Trabalhador e trabalhadoira d’Occitània, amb o sens emplec, organisa te, junta lo movement revolucionari de l’esquèrra occitana, junta Anaram Au Patac !

Borsa del Trabalh d'Alès

Contact AAP- Lengàdoc : lengadoc@anaram.org