ANARAM AU PATAC

congrès de refondacion


Motivat entà passar ua etapa navèra, hòrt de 15 ans d’experiéncia, s’es tengut lo 19 de seteme 2009 lo Congrès de refondacion deu moviment de l’esquèrra revolucionària occitana. Lo respècte deu dret a l’autodeterminacion, un monde shens classa e la solidaritat internacionau son las basas deu naveth moviment panoccitan LIBERTAT.
Deus debats deu congrès de formacion n’es sortida la volontat de tribalhar dens los mes que vienen las arrevendicacions de l’autonomia per l’Occitània sancèra, de miar ua arreflexion sus l’amenatjament deu territòri, de lutar per la justicia sociau e d’aprestar candidaturas entà las eleccions a viéner.

A l’encòp d’aquestas arrevendicacions, LIBERTAT que va lançar discutidas per un projecte de basas politicas que deurà respóner a totas las problematicas actuaus.

Après la Gasconha, lo congrès a viéner se debanarà en Lengadòc lo 12 de deceme dab l’objectiu d’afinar lo foncionament de l’organizacion. Qu’aperam las gents interessadas a participar a la construccion deu naveth moviment de liberacion d’Occitània.

Totun, en esperar deceme, qu’aperam a la manifestacion de Carcassona, a maugrat qu’estossi organizat en Lengadòc peu tresau cop consecutiu aqueth rendetz-vos vitau per l’occitan. La revendicacion que portaram a Carcassona es simpla, shens esperar mei, que volem l’Occitan Lenga Oficiau !

Volem víver e decidir au país!

Libertat, esquèrra revolucionària d’Occitània